ஓடாவி
தொண்டியில் ஓடாவி தெரு என்று ஒரு தெரு இருக்கிறது. அப்படியானால் இந்தப் பகுதியில் ஓடாவிகள் இருந்திருக்க வேண்டும். ஓடாவி என்பது ஒரு இனத்தின் பெயரோ அல்லது ஜாதியின் பெயரோ அல்ல. ஓடாவி என்றால் தச்சன் என்று பொருள். இவர்கள் அணைத்து விதமான மரவேளைகளையும் செய்யும் தச்சர்கள் அல்ல. மாறாக மரக்கலம் செய்யும் தச்சர்கள்.
இலங்கையில் ஓடாவி என்று ஒரு இனக் குழு உள்ளது. இவர்கள் இன்று சிங்களவர்களாக இலங்கை இனப் பட்டியலில் இடம்பெற்றுள்ளனர். அனால் இவர்களது தொழில் மரக்கலம் செப்பனிடுதல் சார்ந்த தொழிலாகும். தொழில் அடிப்படையில் இணைத்துப் பார்த்தால் ஒரு காலத்தில் மரக்கலம் செய்த தமிழர்களாக இவர்கள் இருந்திருக்க வேண்டும்.
இந்த மரக்கலம் செய்யும் தச்சர்கள் பயன்படுத்தும் ஒரு கருவியின் பெயர் ஓடாவி என்பதாகும். ஓடவிகளை கையாள தெரிந்தவர்கள் ஓடாவியார். இவர்கள் மென்மையான மரங்களையோ பலகைகளையோ கையாள்வதில்லை. மரச்சட்டங்கள் செய்து வீட்டு உபயோக பொருட்கள் மற்றும் மர வேலைபாடுகள் நிறைந்த காட்சி பொருளை செய்கின்ற சிற்ப தச்சு வேலையோ தெரிந்தவர்கள் அல்ல. மாறாக மரத் தடிகளை கையாளுபவர்கள்.
இவர்கள் கையாளும் இந்த ஓடாவி கருவிகள் மரக்கலங்களின் பாகங்களைப் பொறுத்து அமைப்பிலும் அளவிலும் மாறுபடுகிறது,
தோணி, மஞ்சு, கொட்டியா, வத்தை, வல்லம், கட்டுமரம் என்று எந்த வகை மரக்கலமாக இருந்தாலும் அதனை மனக்கனக்கினால் துல்லியமாக அளவிட்டு, ஒரு வெள்ளை அடிக்கப்பட்ட சுவர் மீது அல்லது கதவு பலகை மீது எரிந்த விறகு கரித் துண்டைக் கொண்டு கட்சிதமாக வரைபடம் வரைந்து வேலையை தொடங்கி விடுவார்கள்.
ஒவ்வொரு பாகம் வடிவமைக்கப் படுகிற போதும் அதற்கேற்ப துணை வரைபடங்கள் மாறிக் கொண்டே இருக்கும். பாகம் பாகமாக இந்த மரக்கலங்களின் பகுதிகள் தனித் தனியே சிறிய அளவில் செய்யப்பட்டு தனியே வடியிமைக்கப் பட்ட பெருங் கூட்டுடன் பூட்டப்படுகின்றன. மரக்கலங்களின் வைகேற்ப்ப மரங்களை தெரிவு செய்வதிலும் இவர்கள் தேர்ச்சி பெற்றவர்களாக விளங்கினர்.
- அன்றோ ரூபன்
